lp zun Heists - In ‘t frans

Flutse

Kweet nie ojje gieder da nog wit moa de vorige ki klaptun kikke u bitje over de meeuwen en de spreeuwen. Lippens eet dadde vorzekers gelezen van jeet ook van zien latte gegeven. Zoe je peizen ?

Wien wit got ie nog die oede vuulbakken van Heist were in voege briengen en ton kunnen de meeuwen were gon eten in vuile zee. Moa vandoage zoenk u ki wiln klappen over al die fransche woorden die wieder hele doagen gebruken.

Das vurzekers overgewaoid met al die vrimdeliengen binst de zomer... zieder klapten ook nie van dun diek moa van de planchee en nie van un cafee moa van un estaminet.

Tuus hangen we onze pardessuu of onzen impermeabel an de portmantoo juste neffens de bak met paraplus. En ip dun dressoir stoend moeder eur sacoche met eur portemonnee dur in. Moeder ee schoen met tallongs en ip eur bloeze u ferme broche.

Preus lik veertiene gieng zu azo gon wandeln met de kienderfut-teure langs de Boulevard... (in Knokke is da dun Avenue)

’t was al te voete van man wieder nog gin luxevoiture da was veel te sjiek. Wiender kosten mè moeite un klakong of un klienjoteur betaoln. Dur woarden al wel met u velo moa de dieje sukkelden al u ki met ulder frings, of de soeppappe zat nie goed of dur was un rayong gesproeng.

In uus verwarmden wieder ons an de feu continu die rechtover de commode of dun dressir stoend.

On de joengers noa ’t schoole goan (noa de frères of noa de masseurs) en zu ulder carnachière mee en in ’t middelboar zat er doar u schone portepluum in. In de tekenlesse wierd er ankerdesjiene gebruukt.

Vor indruk te moaken an vele wienkels, hotels en restaurangs u fransche noame.

En de menschen van Heist probeerden ook u moendje Frans te klappen tegen de toeristen... ’t was wel fransch met hoar ip moa ze verstoenden zieder da wel. Comment ça va en ga doit va...

Vergiet nie da vroeger al de brieven en de belangrikke papieren in ’t fransch ipgesteld wierden. O je gie da niet koste woar je gie u sukkeloare. Moa dur woaren dur altied wel die een handje kosten helpen, o jeze moa betoalde (beuter bie de vis).

Kgon stoppn mè zeveren. Allez, portemonnee voe bien en toet de noaste kir hé.