Versleten toet ip de droad

Flutse

Ken mien villo gepakt en kzien een ki langs de diek gereen van Heist toet in 't Zoute. Der zat een zuudwester dus int deuregoan ank de wiend in 't gat. En ojje ip joen villo zit ejje tied voa roend te kieken en kmoeten zeggen: men een schoane diek tien kilometers an een stik. En 't strange magt er ook zien. Vele zand, moderne baigneurs en ip de diek vele terrastjes. Stief schoane zien ook die blombakken. Schoane gevuld en proper gedoan. Proficiat, kmoeten zeggen lik dat is. En van Heist toet in Knokke overal even schoane !!! Die verbredienge in Heist van de diek dat is ook een succes. Vele meer zunne en platse. Binst dank an 't stampen woaren enk een ki gekeken noa de priesliesten van de restaurantjes. Hoe dichter bie 't Zoute hoe dierder de mussels.

In 't Zoute enk mien een bulte verschoten, 't Zoute dat is voa de rieke, deze met geld. Ja wadde... 't Eerste dank zoagen was een schoan meistje met een gescheurde broek. Een ende verder nog intje met een gescheurde veste. Vele chiechie moa gin geld voa een otto te kopen met een dek. En ot regent ??? Moa 't ergste van al, die gescheurde vesten en broeken stoan doar ook in d'etalage. En hoe meer scheuren, hoe dierder. Ken ik een ki in mien hoar geschart. Van toendergoed is van 't zelfste: hoe minder stoffe hoe dierder.

Onk ik vroeger een gat in mien broek an of versleten ellebogen ton noaide mien moeder doar een lap ip. An weerskanten 't zelfste omda je da niet zoe zien. En nu lopen ze preus lik veertig met gescheurde vesten en broeken.

Moa verder van de rest ist in 't Zoute schoane en goed wi. Je ziet doa gin geroeste villorekken lik in Heist. 't Is doar in inox en blienkend in de zunne.

Wat da je ook vele ziet zien speciale ottoplaks. Ginnen lik bie ons moa: Chouchou, Loulou, love, Cathy, Cherie, KFCK... en golfkarretjes met elektriek.

En nateurlik ook vele garagaplaks. Da zien der die een chiquen otto euren vor een weekend voa de blagoi uut thangen. Kwestie van indruk te maken, 't Sisteem van: m'as-tu-vu ???

Ken deugd get van mien sortietje met de villo. Surtout bie ons ist al plat hé, juste met de wiend moe je rekenienge hoeden. Enk woaren blieje dank were thuus woaren. Mor eerst nog een potje kaffie ip een terrastje ip de diek.