Up zun Heists

Oje nu in Heist roendlopt zieje nieks anders dan camions en grote kroanen. Ze smieten nu nog meer huuzetjes of dan binst dun oorloge... Heist bestoat nie mè, oje u tiedje nie mè roendgewandeld et ton lopt je verloren injun eigen stroate.

Woar is dun tied dat er overal van die kleine huuzetjes stoenden?
U geveltje met een deure en een vinstertje. De voordeure woar dat alles moeste passeren. Woar dat de brower de bakken bier zette en de bakker kwam met brood en de melboer met de melk en de beuter. Die voordeure paste goed in de gevel da moar een verdiep hoge was en u dekstj e droeg van roo pannen.

Da geveltje was altied geschilderd in ‘t bleek blow of ‘t griest en van oender u band in ‘t zwart (terre) tegen de wakte. Deeje de voordeure open ton zat je subiet in huus. In de voorplekke met doar achter de keuken, dun achterkeuken en ‘t koertje. En ip ‘t koertje vaneigens nog u bitje koteneje (en u platste voa vis te bakken omdat niet tevele zoe stienken in huus...).

De menschen leefden klène moa gezellig. Alles gebeurde ip u poar vierkante meters en de toafel was ‘t centrum van ‘t menoazje, zjuste neffens de stoove. Soms u duvelje, soms u Leuvense stove woar dat teten ip ldoar gemakt wierd, woar dat er in dun oven gebakken wierd en waamee dat ‘t huus verwarmd wierd. Boven de stove hiengt er u droad voa de waste van in de wienter kosten de menschen nie noa de bleek en kost de waste nie buuten drogen.

Oje ‘s nuchtends ip stoend woaren de ruten bedampt en de waste droge en rook je dat de waste droge was. Da was eigentlik speciaal mo we woaren dadde a zo gewend. Boven woaren de slapkoamers. Eén vo voader en moeder en één voa djoengers. Vele meer platse wast er me oender de pannen.

In de zomer wast veel te warm en in de wienter vervroos je van de koede. Van isoloatie wast er nog gin sproake. Djoengers moesten allemolle dichte bie mankoar krupen en de sjoaze goed roend ulder droin. En bie voader en moeder was ‘t van koeroazj e oender de sj oazj e.

De latste kleine huuzetjes wierden u poar moanden geleden afgesmeten: intje in de Kerkstroate en intje in de Vuurtorenstroate. In de Bakkerstroate kuje dur ook nog zien...

Gelukkig en ze in ‘t museum Sincfala u twa achtergemakt en kunnen we da nog togen an de kienders. Ze trekken ulder ogen nog u bitje open wi onze da zien. Gin speelkamer, gin badkoamer, gin televisie, gin computerspelletes...

Buten spelen en de menschen geruste baten en gin kattekwoad uutsteken. Toope eten en vroeg in de mande. ‘t Leven was vroeger heel anders... in die goeien oeden tied. Mor iederèèn is toch blieje dat da vorbie is en da we nu vele platse en confort èn.

Flutse