Ip zun Heists

Van deze ki goan wu u ki u pluume smieten noar al de propere menschen van Heist.
Bie ons leeft ur nog vele schoan volk. Ze kakken nie ip ulder zulle en kuusschen ulder trottoir...  Alle doagen zien kik dadde mè mien eigen ogen: al die wuuvetjes die ulder ruuten ant wasschen zien, en ulder trottoir voagen of ofscheuren. 

Dat is eur gewente van vroeger. Ik zien ze nog altied met ulder petattemestje ‘t gas van tusschen de keien schrepen ip de parkeerplatse voar ulder deure. Ze stroaiden ook eerst wè met zoekt of mè kokend woater. Ipgewoaid zand wierd alle doagen ipgevoagd en met u vuulblek in ‘t rioolpitje gesmeten.

Onze vrown stoenden voar ulder deure te kèkelen, met ulder bezem in aanslag. En oster ulder u vint wilde ambeteren ton krieg ie zekers u bustel in zien nekke. In Heist ist nog altied proper, omdat er proper volk weunt, die geren et dat nie vuul is voar ulder eigen deure.

‘t Is lik van da sprikwoord: voag moar u bitje voarjoen eigen deure. Da wilt eigentlik geweune zeggen: zwieg van dandere en kiekt no ju zelven! De zulle ofvoagen was en is doageliksche kost. De trottoir ofscheuren met blikwoater, da wierd u kir in de weke gedoan. Meestal de vriedag, want de vriedag was de kuuschedag. 

U klikke woater ip de groend. U bitje eau dejavelle en ton moa sjette geven met de bezem. Ot goed schuumde un emmer woater dur over en ton oftrekken. En d’echte trokken da ton nog u kir of en dwilden da droge. Un hele ceremonieje, mot resultoat mocht gezien zien. En de vuuloards giengn over de toenge in ‘t geburte, zie moa gerust. En ton de ruuten. Van ot begoste te regenen sloegen ze alarm en zoaten ze te wachten toe dat ipkloarde. En ton schoten zu in aktie.

Met u proper zoptje gieng ze tun aanval. De spoense in ‘t sop en mo wrieven toe dat al de vuulte weg was. Tonne ofspoelen met proper woater en de ruuten oftrekken mè zukke klein trekkertje. Ot da gedoan was dur nog u ki over met un droog zeemvel. En d’echte wreven ton nog u ki over ulder ruuten met gazettepapier vor de boel ip te blienken.

En ip ‘t ende kosten ze nog u klaptje doen, over ‘t zunnetje en over ‘t goe were en die smèrige regen.

U propere zulle en blienkende ruuten, wa moesten ze meer en? Moa vergeten we nie dat d’Heistenars nog altied stief proper zien. En ze kriegen nu ook hulpe van de stroatevoagers en die mannen met ulder voagmachientje. U stroatevoager verdient al ons respect, want tenslotte roapen zieder al onze vuulte ip. Chapeau! 

De menschen lachen dur diekwils u ki bie. Stroatevoagers en stroentroapers achter dun tring.Moa ‘t is toch dank zie die menschen dat bie ons zo proper is. De vrimdeliengen trekken bie ons nog u bitje ulder ogen open zulle, want in ‘t stad zien zu da nie gewend, die propertijt.

En ook de menschen met un hoendje zien dur ip verproperd. Ot dun oend gescheten eet, ton roapen de meeste dat ip en smieten ze dat in u vuulbakstje.  Gelukkig, van vroeger was da gin mode en moestju kieken woar dajuje voeten zette, ofjaat pries. En ze zeggen wel : stroent is geld, moar onju dir in gestampt et, is da toch smèrlapperieje... enje droagt dat overal mee, toe in huus.

Ook ‘t strange wordt alle dagen gekuuscht. Je zoe du ki moeten weten wa da ze zieder allemoale moesten ipkuuschen. Alle dagen zakken vul. Moar omme wiender ipstoan en ons wandeliengstje moaken, is ‘t ipgekuuscht en proper. En ton zien die menschen al moewe gewerkt.

Ook doar moeten we u kir ip peizen.

Meugen kik julder allemolle u ki vroagen voa nooit nie mèr u ‘t wadde ip ‘t stroate of ip ‘t strange achter te baten ? En ojje één ziet die de vuuloaerd uuthangt, reclameer moa en wies dem met de vienger.

‘t Is mor omme allemolle proper zien en bluven dat Heist ip ze schoanste go zien.

Das leute voar ons en voar al deze die bie ons ip bezoek komn. U platstje da proper is wordt gerespecteerd. Ot ur gin vuulte ligt, goan ze dur ook ginne bie smieten.

Zegt da Flutse da gezeid eet

Flutse