IPZUNHEISTS...

Waor is dien goeien oekden tied van die oederwetsche vuulkarren.
K zien ze nog altied rien, die open kammions vul met vuulte, en ton u poar mannen doar achter voar al de vuulte van de menschen in de bak te smieten. Wit je gieder dat het moa roend 1850 is dat de gemeente gezeid eet an de menschen da ze ulder vuulte nie mè los ip de stroate mochten smieten. Da komt omdat er al u bitje toeristen kwamen en die menschen van ‘t stad woaren da nie geweune voa vuulte te zien liggen voa de deure.

Vroeger an de menschen ook bielange zovele gin vuulte of nu. 0 je noa de wienkel gieng dan wast u karkielootje van ‘t ene en hoenderd gramn van wat anders, en da wierd ot goed gieng in u papiertje of u zakstje gestoken en ton allemolle tope in moeders netzak. Gin plastiek zakstje of u doze, niemendalle. Alles wierd nog in ‘t gewichte verkocht. En al den afval wa da koste branden wierd in de stove gesmeten. A zo ajjer dur twi keren deugd van.

Sorteren mosten de menschen nog nie doen, want dur was nie vele te sorteren. Vanal die plastieken smèèrlapperieje was tur nog gin sproake. Nu en de joenge menoages alle doagen al u vuulzak mè pampers van de kleine joengers. Vroeger deden de moedertjes u doek an, en ot ie vuul was, de waste was tur goed voaren. Nu ziend allemoale geen zukke menoagewuvetjes nie mè wi.

De vuulkarre reed deur de stroaten, en af en toe wierden de mannen wel u ki binnengeroepen vor u twa mee te pakken of voar u ki de kele te spoelen. Regelmatig kwamen ze bate an in de depot met u zinder ip.

lp u bepoald moment voeriden ze u twadde uut voa t affeseren : gedoan is avond.

Da wilde zeggen, hoe rapper da ze gedoan han met ulder toernee, hoe rapper da ze noar huus mochten.
En kunje verzekeren, er woarn dur die sjette gaven... voa rapper ip karweie te kun goan. Moa t voarnoamste was dat de stroaten rap proper woaren : alles schone gekuust en gekamd, lik of dame zeggen...

An de vuulkarre werken was niet te oenderschatten. Duuzenden kibos mosten dur in de bak gesmeten worden. En ip de karre stoend er één om de vuulte u bitje goed te ban. Moa da was ook de man die zorgde vot drienkgeld.

De flastjes die kosten ingedregen worden, wierden aan de kant hoeden. En al de pakstjes en de zakstjes woa dat ur punten ip stoenden giengen ook door zien handen. Eigenlijk wa die mens a bezig mè sorteren zoender dat ie da zelve wist. En ot ur u ki untwadde was da ze nog kosten gebruuken, ton wierd dat ook an de kant geleid.

Bakstjes en plangstjes kwamen dur nie ip den oop... da wierd gebruukt voa de stove an te steken. Takkelienge van den hof zag jook a zoa nie. De menschen weunden kleine en an gin hof vor ulder plezier. An ze wat achterland, ton was da voa groensel te kweken, en de afval van de riepe groensels wierden ipgeten deur de kiekens en de keuns. Dur wierd vroeger bielange zovele nie weggesmeten of nu.

Moa we goan nog u ki noa de vuulkarre.

In Heist verplichtten ze de menschen ip u bepoald moment voa allemolle gelieke vuulbakken te kopen an de gemeente. Schoane bakken gegalvaniseerd en met u deksel. Nu zoen ze zoagen en ertefretten dat die bak te zwoar is of stienkt, moa vroeger was da gin probleem. En doekde menschen vroegen aan de gebeur voa de vuulbak buten te zetten, zoender komplimenten.
‘t Gieng allemolle van ‘t zelfs.

Kestdag en nieuwjoar woaren hoogdoagen voa de mannen van de vuulkarre.

Overal giengen ze binnen met de wens van ‘t joar. Ip d’ene plekke kregen ze u poate drienkgeld, ip d’ander plekke sloegen zeen achterover. U pientje of u dreupeltje... en tegen de noene wisten ze ‘t stort nie mè liggen. Meer dan een is tegen dek gegoan, en de vuulbakken stoenden schots en scheefs ip stroate. Moa de menschen kosten doar nog mee lachen, ‘t was de tied van tjoar. Nu zoen ze noa ‘t stadhuus beln en reclameren...

Van u verbrandiengsoven was ‘t ur ook nog gin sproake. Al de vuulte gieng not ‘t stort in de Heistloane, bie Ramskapelle.

De kliettepitten wierden gevuld, en achter u tied wierd dien oop vuulte al een bergtje. U goeie remedie voa de vuulte weg te kriegen was de boel u ki in brande te steken. Eigentlik mocht da nie... moa ja, ‘t was un oefenienge voa de pompiers en binstwille was ‘t weer un hoop minder.

Aangezien dat ur nog nie vele plastiek tussen zat en ook gin “Klein Gevaarlijk Afval” kost dat nie zovele kwoad voa de groend. ‘t Zat nog gin vergif in de vuulte, en de kliette hield vele tegen voa ‘t groendwoater.

Vele vele jaren giengd de vuulte van Heist noar ‘t stort an de Heistloafle, en gin mens die doa problemen mee had.

Met de fusie moste alles noar de verbrandingsOven, en nu is da de beste iplossinge, want met al de vuulte da we nu en zoet nie mè goan ook. Nu ist de flasschen in de container, de gazetten bie toed papier, de takken van den hof noa ‘t kontainerpark en al de speciale gevoarlijke diengstjes in die groene plastieken bak da we tuus gekregen èn, moa dat er niemand nog wit stoan.

Flutse