Da Spil

Flutse

On de klèènkienders vroeger ip bezoek kwoamen bie pee en mee ton was da kerremesse voa pee en metje en ook voa de joengers. Der wierd verteld, gelachen en spelletjes gespeeld. De kienders, voader en moeder, metje en peetje ze klapten tegen mankoar lik of dazze mankoar in joaren nie mè aan gezien.

On de klèènkienders tien joar geleen ip bezoek kwaamn ton wast er gin kot mee thoeden.

Ze ploagden mankoar, ze woaren dwèès in de zak, ze mieken ruuze voa de tillevisie, den enen wilde noa buten en den anderen boegeerde nie in de zetel. En pee en mee woaren blieje onze noar huus giengn allene al voa 't geruchte. Ze woaren ip van de zenuwen.

Moa de tieden zien veranderd I

On de joengers nu komn ton hoor je ze nie mè. Zen allemolle zukke klèèn bakstje dat af en toe laweit makt en woarmee dan ze ook al een ki tillefoneren. Ze smieten ulder in de zetel en 't komt doar gin woord nie mè uut. Allene nog ulder duums goan weg en were.

Zen gin tied nie mè voa ruzie te moaken of te dwèèzen... 't is da bakstje da telt. Ot opa of oma entwadde zeggen ton horen ze zieder da nie met da spoptje in ulder oren. En zelve untwadde vertellen dat is verleden tied. Gezellig ku je da nie mè noemn hé.

Onze achter een poar euren vertrekken ist gelik of dan ze niet gewis woaren. J'et er niet nie mir an. Een aai-pot noemen ze dadde. Mailtjes verstieren, twittern en van alles da niet deugd zoeken ip internet. Onze untwadde nie weten zoeken ze dadde ip mor onthoeden dat is wat anders hé.

Loater gon ze allemolle rimmaties hen in ulder viengers en ulder duums van hele doagen te tokkelen ip ulder spil. Klappen tegen mankoar doen ze nie mè. Onze untwadde te zeggen èn ton stieren ze een berichtje... ze meugen zelfs neffens mankoar in de zetel zitten.

Das communicoatie,de sociale media. Niet ist er zo a-sociaal.

Smartphone, Apps, chatten, like-n, twitteren... gin mens die da nog verstoat en ojje da zegt tegen die snotoapen ton lachen ze je vierkant uut. Den oeden tied, t joar stilletjes...

Ken een ki gezeid tegen de klèènkienders: Zoe je gieder nie beter een bitje buten spelen ? en wat deden ze: ze pakten da spil en zetten ulder allemolle ip de terrasse met da bakstje.

Ja, ze speelden buten moa zoender te bewegen. Gin voetbal, gin kattekwoad allene moa da bakstje. 't Is verre gekomn.

En 't is nog nie gedoan. Alle weken vienden ze wel untwadde anders uut voa de joengers bezig te hoeden.

En voader en moeder moa betoln.