Oew ist ?

Flutse

On de menschen mankoar tegenkomn langt stroate ton ist teerste dan ze zeggen: Oew ist ?

Je zoe peizen dat allemolle dokteurs zien... of kurieuzeneuzen. Oew ist ? En onze nie weten wa gezeid zeggen ze tonne: 't is wè lange geleen hé.

't Is goed dan ze nog klappen tegen mankoar en tenminste untwadde zeggen. Van in de nieuwe stroaten met al die appartementen kennen ze mankoar nie mè en lopen ze zoender te kiekken mankoar stroale verbie. 't Kut ulder ook niet schiln oewe dat is. Lat me gerust en ik loaten joen ook geruste.

Wien kent er nog zien gebeur ? En pertangs een goeien dag en een goeien oavend kosten gin geld. 't Is de moderne tied.

Goat uut de kant, lat me geruste en lat mee deure. Tied voar een klaptje is 't er nie mè. 't Is hele doagen van hoast je zere wèr je. Z'en lik allemolle vitessepiln geslikt.

Wien kent er nog zien wiekagent, zien facteur, wien eet er nog een melkboer en ziender nog bakkers of browers die thuus leveren ??? Sociaal contact noemen ze dadde. Vergit het!

De dag van vandoage ist allemolle met de komputer. Ojje untwadde nodig et ton stier je een mailtje. Wil je eentwadde weten zoekt het ip met Google.

Ze lezen nu al boeken ip ulder tiliefong. En in de platse van te klappen tegen mankoar stieren ze een berichtje.

Djoengers zitten hele doagen te tokkeln ip ulder spil en 't komt doar gin woord nie mè uut.

J'hoor ze nie mè.... Ze zitten stille en verkopen gin miserie moa wa zieje doa bie... ze doen ulder muulle niet mè open.

Oew ist ? Ze kieken noa je lik of dajje van een andere planeet komt. Voa wa moe je gie da weten lezenk in ulder ogen.

En voa toch eentwadde te zeggen beginnen we ton over 't were. 't Is wel schoan zunnetje hé... tee wè vele geregend hé... ejje 't ook horen dundern ?

Over 't schoole moe je zeker nie begin. Lat me gerust en zoag nie.

En toch en de menschen nog nooit zovele gesproken over communicatie en sociaal contact. Moa ik vroagen mien of on al de deze die der zovele over klappen ook thuus ulder moend open doen en ip stroate ook een klaptje doen. Onze ook een goeie dag zeggen en tied en voar een babbeltje, 'k Peinzend tnie. Da past niet in ulder kroam.

We zoen beter allemolle een ki meer ip café goan en luustern noa mankoar en thuus verteln wat damme hoort en. Een gezoende babbel lik in den oeden tied en vele problemen zoender ipgelost zien. Wiln we der allemole een ki bie gebin ?