In ’t dialect

Flutse

lp de televisie was ter vele te doen over ’t dialect. Ze zochten u woord in ’t West-Vlams da heel speciaal was: Zurkeltrutte.

Kwoaren nateurlik kontent mè da woord moa thuus durven kik da nie zeggen wè. Zurkelpetatten al wat da je wilt, moar e zurkeltrutte... da zeg je toch alleene moa tegen e peeze van e wuuf. E zeurpruume of ene die heur eigen zelven nie geren ziet. Allé, e kruusgienge van e tange en e pezewever.

Un anbetant vrowmens da hele doagen zit te sjikaneren. Ene woavan dajje zoe de meuren ip lopen...

On de vinten oender mankoar bezig zien hoor julder feeszeln:

Dat is e zuupteele ze lopt hele doagen poepeloere.

Dat is een stomme trutte en ze lopt lik e slunsepuppe.

Dat is ene die te luzig is vor e stroentvliege doad te sloan.

Zeed e muule van lintjes en zis un heksevel van e vrowmens.

’t Is un echte pekelteve enk zien liever eur ieln dan eur tènen.

Moa tis ton nog beter dan e subbedutte of e gasgeete.

En met e slunsepuppe ziej ook nieten hé.

Tegen e pruttig wuvetje gojje da toch nie zeggen hé. Kwil zeggen e schoan mokstje woavan dajje sebiet jukte zoe kriegen. E crème-tje of e lek me liptje. Intje dad ipgetuuttematooid deur de stroate lopt en ojjer dur noa toe kiekt dad kwielsel uut je moend zoe komn.

E koeketiene voa van te droomn.

Lik of da me zeggen: e schone kokketeute, ene met alles drip en dran.

En ‘k peinzen ton in mien zelven: Onze Lieven Eere ee tur agliek zien werk van gemakt hé... en allemolle van één rebbetje !

Dur zien nateurlik nog vele schoane diengen te zeggen in ’t dialect.

Musschien moetn wook e ki un westried doen voa t schonste Heistse woord ?

E vorsmaktje :

Wa peis je van e klèèn pumukkeltje ?

Of de kurremurre die nog ip toafel ligt ?

Of sjoerelen ?

Of sturten ?

Of sjikaneren ?

Of pioanewies ?

Of reutepeteute ?

Kgon stoppen en ‘t noaste ki ist over de vinten en ton kun de vrown e kir ulder hertje ip oln. Kzien dur moewe van, kzien t gat of en k zien bek of en doar voaren gonk de rieme of leggen en mien schippe ofkuusschen.