Ip zun Heists

 Flutse

't Is were van dadde: met de beste wenschen en al wat da je wilt. Un goeie gezoendheid en vele koeroaje.

De kesboom stoat er schoone geparreerd met boln en vooral un grote pinne vanboven.

En oender de kesboom tusschen de pakstjes stoat er un kest- stalletje met kiendje Jezus en heel de battaklang: Jozef en Maria, dherders, de schaopen, de drie Keuniengen met ulder kamelen en vaneigens ook un serieje iengeltjes.

Kestdag en Nieuwjoaer zien schoane momenten in 't leven van u mensch.

Mè nieuwjoar komn djoengers met ulder nieuwjoaersbrief.

Beste Peter en Meter, oe meer da je gift oe beter... en gif je niet ton zie je mien peter (of meter) niet!

Schoane lik of dat die kiendjes ulder nieuwjoarsbrief lezen... of ipzeggen van zen da in 't schole van buuten geleerd.

En pee of mee zitten ton iedere ki te blèten van alteroasjie, da pakt u mensch ee.

't Zien schoone doagen en dur wordt ton ooke vele gesmoefeld.

0 je bin komt kriegen de grote menschen un dreupel of un Elexir d'Anvers... met u lukstje en alle soarten andere balgvullienge.

En ton ist kalkoene of lik vroeger koejetoenge in de Maderra- sowse met kroketjes en u poosie paddestoeltjes of karrotjes en errewitj es.

Soms was took u stikstje rosbief mè boontjes en witlof... of blomkoole in dun oven.

U mensch kriegt er oenger van van drip te peizen.

En achter Kestdag komn de joengers ton zieng an de deure met u liedje over Driekeuniengen.

Je moet ulder nu gin spekke mè geven of u schelletje zoetekoekke. Nu en ze liever u bitje geld voa zelve snoeperieje te kunnen kopen.

Ja de tieden zien veranderd en wieder ook. 't Was vroeger gezellig moa nu ist ook leute en geestig mor ip un andere maniere.

Moa tis goed da we u ki were goan nor dun oeden tied en ons trachten in te beelden oewe dat da tonne was... allemolle rond de stove en an toafel met u zelve gebakken toarte en voa de vinten u ferme dreupel. Vele totten en lekken en kadootjes geven en vooral vele vertellen over mankoar en over 't joar da gepasseerd is.

Ja, da woaren nog u ki tieden hé.