Ip zun Heists

Kgong kik ook moa begin met de beste wenschen hé. Darnme vele meugen meugen en kunnen kunnen en dat iedereen gezoend en wel da nieuw joar mag deure spartein.

U tiedje geleen zienk ook noa Knokke gewist vor u ki te kiekken noar al die plangs en prozjekten. t Is wreed hé dajje moe noa Knokke goan voa te weten wat dat er in Heist goa gebeuren... Ot dadde allemolle deure goat in Heist goan ze dur wel u twa van moaken hé. Moa ja, zen al vele geschreven en gewreven en al toope is t er nog nie vele veranderd in Heist.

Dat oed tramkotje stoat dur nog altied lik u vuulle barakke. En in de Kursaalstraote eet de privé a vele gebouwd moa dur stoan doar nog u poar huuzen lik rattekoten (nu ofgesmeten) De diek van Heist is nog altied t smalste stikstje van heel de gemeente en omme nie ippassen zien de groene a gauwe boas van héél t strange. 

t Heldenpling ligt er nog altied even triestig bie: gin blornmetje

of gin plantje en u kotje dad al in jaoren gin lekstje verve gezien eet. De stoasie van Heist is un echt schandoal. Vuul en smèrig en zelden nog utwien voa de menschen te bedien. Ken die nieuwbow gezien van dien ~merikoander en kpeinzen in mu zelven dadde is weer vele fantasie mè vele appartementen woa deure dad er wel were een zien zakken goa kunnen vuin.

t Vurnoamste is dad Heist u schoane statie kriegt met u goeie bedienienge en met parkeerplatsen woar dad de menschen nie moeten
betoln binst da ze noar ulder werk zien. En nateurlik ook al eure u tring die ip tied stopt. Van mien moet dadde azzo gin scheve bow zien van t is lik u meur tusschen t centrum van Heist en t Kijkdorp of lik of da ze nu zeggen: Oostwinkel en Heulebrugge. 

Eigentlik zoen ze beter u goeie verbiendienge moaken tussen t centrum en die nieuwe wieken en van de Boendgenotenloane en de Kursaalstroate u Lippensloane maken. En ostjeblieft u bitje respect voa t Boerenhof en de groend durroend! 

Moa ja, zu gont an mien nie kommen vroagen hé.

En ton ons stadhuus, wanneer gon ze doar u ki treffelik werk van moaken. Heel de boel ofsmieten (Roavelingen en dat geroest lesderwerk buuten dur bie) en doar u schoon hotel ipzetten en dur nateurlik voa zorgen dad de Heistenoars vor al ulder papieren doar ook nog kunnen geriefd geroaken. Ze zoen daar ook nog een Post kunnen openen zoa da we niet mè noa Knokke moeten sjaffelen vor onze recornrnandees en pakstjes.

Alli, dur is werk aan de wienkel en ken tu kik toch were u ki gezeid hé.

Flutse