lp zun Heists

Kwilnjulder vandoage u kir u twa verteln over de meeuwen en de spreeuwen.

In Spanje vocht Dongkiesjot tegen de wiendmeulns en in Knokke wilt Lip pens nu vechten tegen de meeuwn. Ze vliegen nu a zoa lange over ‘t woater, ‘t strange, de duun en zelfs toet int binneland. En vele menschen vienden da schoane voa noa toe te kiekken.

Vaneigens moe je die beesten gin eten geven en moeten ze van onze vuulzakken bluuven... Moa de groene moen ook nie aapmoa klap pen van beschermienge. Lat iedereen doen lik of da we dat al joaren gewend zien.

An boord van u schip wierden dur wel af en toe u ki meeuwen gevangen. Tangde lie vele vlees an, moa ‘t was toch u bitje knabbelienge. En ‘t meeuwevet was goed tegen de rimmatiek. Oje u schelle meeuwevet ipje bille lei ton voelde je niet mè van jun reumatiesm... zeiden ze. As kiend hemme ook meeuwen gevangen. U stikstje broad an u fien towtje in de duun.

De meeuwen pikeerden en slikten da broad in toe verre in ulcder slokderm en a zoa kost je u meeuwe vangen.., van da brokstje bleeft steken en vast an da droadtje.  Da woaren nateurlik altied die kleene meeuwtjes met ulder zwart koptje in de zomer en ulder recht bekstje.

Die groatere kastards met ulder gele kromme bek kwamen ton nog nie zovele an land. ‘t Zien die smèèrlappen die an de vuulzakken zitten en ‘s nuchtends zovele laweit moaken! Moaja, we zitten an de kust hé en ton moet je nie zoagen over ‘t laweit van ‘t woater en ‘t kneschen van die meeuwen ot begint kloar te worden.

Das ‘t zelfste lik die rieke stienkoards die u villatje bown in de weien en ton van ulder kloaten moaken ot de boer an ‘t vetten is. Nateurlik stienkt dadde moa dad is toch de reuke van de boerebuuten zeker.

En ‘t is zelfste van de spreeuwen. Schoane voa noa toe te kiekken onze in u dikke wolke vliegen en ulder ton zetten in de boom voa te sloapen of vallen in de weie voa ‘t eten. Mor ojun otto oender zukke boom stoat en oje ‘s nuchtends ziet daje dek vulgescheten ligt van die spreeuwenstroent ton zoeje wel u kir injun oar scharten zeker. Nu mag je gin spreeuwen nie mè vangen en nie mè ip eten. Tindemans eet da garanzjeert in 1974.

Da was purtans goed in de pot u kluts spreeuwen. Moeder liet da stooven met ajuuns en u klikke bruuff bier enjat eten vor un eure. Al die peuzelienge...

‘s Nuchtens vroeg in november ot mistig was zaten de vinten in de weien met ulder schuufeletje voa de spreeuwen te doen valn... en tonne ‘t net baten toesloan en ga pries. Af en toe zat er wel u ki un veugeltje in lik puttertjes, distelvienken of kneekertjes moa da wierd ton verkocht voa de zang. Nu is dadde allemolle verbie, verboden.

Nu krioelt ut ip zommige platsen van de spreeuwen en verjoagen ze die veugeltjes met de kreten van de roofveugels. Moa die spreeuwn zien ook nie van gisteren en zen zieder da rap deure. K peizen da ze zieder u ki lachen met de menschen beneden en al ulder roare manieren. Ze zitn zieder oge en droge in ulder boom en peizen vurzekers in ulderzelven:

Lat de katte moa zeken... ze gont zieder rapper beu zien dan gewend

Flutse