Ip zun Heists

Woar is dun tied da wu met u portemanneetje in onze broekzak roendliepen woar dat ur alleene moa kleingeld in zat: un poar roste kluten, u kartje en un half frenkstje. Vor u klute kostje u spekke kopen en ip tende van de weke woaren we blieje omme u kluute kregen voa drienkgeld. De menschen aan niet te vele en moesten hele doagen spoaren. Spelen ip de beuze kenden ze niet. Ot goed gieng aan zu ip tende van de moand u twadde over en da zetten ze ton ip ulder spoarboekstj e.

Van Fortis, Dexia en KBC was tur ton nog gin sproake. De visschers giengen noar de BAC en de werkmenschen aan u boekstje bie de Spoarkasse, dun ASLK (Algemene spaar-en lijfrentekas). Je kost ook noar de Post goan mèje geld moa ton stoengje doar in de reke en Jan, Pier en Pol kosten ‘t allemolle horen.

Ojje u twadde ipje boekstje zette ton wierden dur zegeltjes geplakt. Da was t bewiezetje van destortienge. Soms was dadde tien frank, fiftig of zelf hoenderd frank. Spoaren was vergoaren en de menschen deden ulder besten om u twadde over ten... voa loater. Van leniengen was tur azzo gin sproake. ‘t Was moar ojje geld at daje u twa koste kopen. Je in deschulden steken voar u twa te kopen da was u schandoal. Un huuzetje kopen da was nateurlik de droom van iedereen.

Mè vele te werken en goed not ‘t bord te kieken kosten de menschen u twadde an de kant leggen en achter vele j oaren aan ze ton biena genoeg vor un reekhuuzetj e. Met ‘t schiet in de broek giengen ze ton noa de bank vo nog u stikstj e te lenen, die latste tien of twientig purcent. En ton moesten zu de reste van ulder leven afbetoalen. Moaja, ‘t was ton betoalen vor ulder eigen en nie mè vor un ander hé.

Nu gon de joenge gasten al schuufelend noa de bank vor praktisch alles te lenen en willen ze alles al en van in ‘t begin. Ze willen dur vele geniete van en...  Vroeger gieng da niet azzo. Moaje zie wel van ter allemolle van komt. Wieder zitten in de misene en de banken nog meer. Iedereen zit in de schulden toet over ulder oren moa t ziendur winnig die tan ulder herte baten
kommen.

Ze gon nog altied ip reize, ze nen met u sjieken otto, gon af en toe gon eten en tuus en ze u radio, u televisie, u frigo, u wasmachine, u droogkasse en u helen oop electronisch materioal. T grotste probleem is da ze gin tied mir en voa doar allemolle mee bezig te zien.

Van zent veel te druk en koersen van tene noa tandere en ze zoen ulder zelven vurbie lopen. Nu noemt da stress en vroeger was dadde van oast je, zere, wèreje. Was ‘t vroeger beter ? K weten ut niet... Die goeien oeden tied at ook zun goeie en slichte kantjes hé. Nu zitten de banken met u gat en vroeger zat er een gat in ons klééngeld.

Flutse