Ip zun Heists

Sint Nikloi e were gewist en nu stoat de kestboom gepareerd in de livienk. ‘t Is doenker om me ip stoan en ot viere is moeten we awere de lucht aan steken. ‘t Is nie moeilijk, we zien in de doenkere zes weken. ‘t Kost vele geld aan den elektriek en vot u bitje warm te kriegen in uus moe je vele stoken. Gelukkig hemme gin stoven nie mè en moe me zuste ip u knoptje duuwn. Moa ‘t was vroeger wel gezelliger in uus met de vlammen die speelden langs de rute van de stove en u schien gaven ip de meuren. Tat u twa speciaals, mysterieus, surtoe o heel ‘t menoage tope roend die stove zat, zoender tillevi sie. Dur wierd toan nog geklapt en verteld.  Tegen Kestdag wast alle joaren dezelste ceremonie: u kestboom kopen en meebrieng noar huus, de luchtjes, de bom, de pinne en ‘t keststalletje van de zolder oln en ton de boom beginnen pareren. Da deen voader en moeder tope. Voader zorgde vor den elektriek (en ‘t gieng nooit van dun eerste ki met die lamptjes in de boom) en moeder zorgde ton voa de versi en enge.

Osse de pinne boven ip den boom zette, moest vaoder eur goed vaste oeden, want ze stoen tonne te trillen boven ip u stoel. Da woaren schone momenten van voader durfde heur toan wel u ki in heur leen pakken binst dat de joengers dur bie woaren...
En hoe meer da ze i peur tippen stoend, hoe liever dat ie da had.

De kestebollen moesten schone kloar liggen, en allejoaren woaren dur akstjes tekort voa ze ip tangen.

Ot alles in de boom hangde kwam moeder ton met u pakstje iengeloar en da maakte van dien boom u kunstwerk.

De grote lucht in de livienk moest uut en de luchtjes in de boom wierden aangestoken en iedereen was~ontent en gelukkig. ‘t Was de schoonste tied van ‘tjoar: koed buten en warm vanbinnen in ons hertje.

‘t Voornoamste was ton da keststalletje met Jozef en Maria, den os en den ezel, de drie keuniengen, de schaptjes woar dan de kienders die kosten van bluuven, derdertjes en in de verte nog u kamele.

En ‘s avonds ton u liedje ziengen, heel tmenage tope: van dherdertjes of van Adeste... ‘t was voa dur koed van te kriegen.

Da was die goeien oekden tied, zoender plastieke bomen en zoender valsche sneeuw en zoender totetrekkenieje.

Flutse