Ip zun Heists

Vandaoge gon we ut u ki en over ‘t bustje van Heist.
Tussen Heist en Duunbergen, u schoon stikstje duun woar dat er gelukkiglik nie gebowd is en woar dat de menschen kunnen wandelen ip ulder gemakt, en dejoengers nog u bitje kun speeln.

Da bustje van Heist is tur eigentlik gekommen omdat méér dan hoenderdjaor geleden men d hoave van Zeebrugge voorzien had in Heist...

Da stik strange en dune ten oosten van Reist wierd dus aangekocht door de Stoat en kost niet verkoaveld worden. Moa al bie al werd er anders beslist en kwam ter een hoaven an de westkant van Reist (Zeebrugge). En de Stoat stoend daar met ulder groend da nie mè koste verkoaveld worden. En da bleeft dus dune en strange.

Vroeger stoenden de baigneurs met ulder kabientjes u heel ende langst ‘t bustje. Ze kosten wel me anders want toet aan ‘t hotel Bristol kwamt ‘t woater tegen den diek.

Binst den oorloge bowden de Duutschers ook in ‘t bustje grote bunkers en achter den oorloge speelden de kienders van Reist daar in. Da werden kamptjes en ‘s avonds kwamen ze daar ook wel u kè vrijen.

Zelfs nu nog zitten dur bunkers onder de dunen.

Achter dun oorloge zag de Burgemeester de Gheldere ‘t gat schone om van da bustje iets schoons te maken en ie vroeg ton ook an Openbare Werken om da aan te leggen. U stikste dunen, u stikstje park en u stikstje voa de tennissers. En da wierd allemoalle gearrangeerd duer de Stoat en tis doar om dat dat bustje zukke roare noame eet: directeur-generaal Willemspark. Da was de boas van Openbare Werken en om em te bedanken voar.~al da werk en ze em die noame gegeven. 

Je was tie content en Heist ook.

Vroeger was tur doar u koarterskotje, woaren dur daor WC’s en stoend er u schone herte up die steenbrokken. Héél Reist e verzekers u foto up dien herte. En ton was ter nateurlik ook nog de vispit, de keunepit en da woater met die spugende zeehoend.

Ieder zundagachternoene wierd er gewandeld deur ‘t bustje en deure goan langs de boulevard en werekeren langs den diek. En ‘t zien dur nu ook nog vele die da regelmatig doen.

Flutse