Ip zun Heists

De latsten tied is ‘t al wat da de klokke sloat: terre.

De polities rien met ulder otto’s langs ‘t leeg woater voa te zien otter gin veugels liggen met terre an ulder vlerken. Ze zien ook ant kiekken otter gin terre is angespoeld. En da komt allemolle van die boat die gezoenken is met drie duusd otto’s geloan : den Tricolore....

Oewe da da meugelik is verstoat ur niemand, moar ‘t is toch gebeurd. Zoavele platse en toch nog boksen...

En ‘t ergste van al is dat ur al verschillende andere boaten ip gevoaren zien. Ze peizen zieder zeker dat da u verkeersdrempel is en da ze troage meugen deure voaren. Of ziend de Fransche die tnie kunnen explikeren in ‘t Engels en daordeure u verkeirde positie geven?
In alle geval, we zitten wieder dur bie, met de vuulte.

Terre ip ‘t strange is u vuule poosie, en da nie alleene voa de veugels.
Nu moaken ze doa vele tamtam roend, en da dis moa goed ook. Vroeger mieken ze doa zoavele gin spil van.

Ik weten nog goed onk kik u klm joengetje woaren, da ‘t woater nog toe tegen de diek kwam. ‘t Strange begost eigentlik moa goed vanaf de Bristol. De mensschen zoaten ton ook nog vele dichter bie mankoar. ‘t Enden de villa’s was tur gin droog zand, en zeker nog gin stik voa de veugels allene. Iedereen mochte lopen woar da ie wilde. En dur was ton ook nog gin meur van Zeebrugge langs die kant, je ku goan peizen.

Moa zelfs in dien goeien oekde tied was ‘t er ook al terre. En ton was da u grote miserie. Omme wieder tuus kwaamn, riep moeder al in colère : moa van woa kom je gie nu... en kiekt u ki noa je voeten.., en van woa zien die plekken ip jun emdetje?

Maamme wieder ip ‘t strangegespeeld en in de terre gestampt, zoender daamme ‘t wisten.

In die tied droegen we nog gin orloze, moar om mu tuus kwaamn, wisten we subiet hoe bate dat ‘t was.

Moa da was nog ‘t ergste nie.
D’hotels aan vele meer reden voa te kloagen.
Van die vrimdeliengen aan nateurlik ook in die vuulte gestampt en je kut toch wel verstoan da ze da mee noa bin brochten. Met ulder vuule poaten ip die schoane tapieten, en ton die koamers heel bedretst.

‘t Was voa bie te schreimn.

En je meug me geloven, da gebeurde meer of ene ki pur zomer. Da stok ton al nog nie te nauwe en die schepen kuusten ‘t ruum zoender komplimenten. En tegen dat de terre ip ‘t strange lag woaren z’al an den andere kant van de wèreld.

Ook de baigneurs kosten doar nie mee lachen, want ulder pliangs wieren ook vuul.

In die doagen rook het overal noa asscheton en white spirit.

Met u vuule slunse vrieven ip de plekken, euren an u stik.

En ‘t was nateurlik ook slichte reclame voa de kust: wien komter nu in feite nor u vuul strange?

De mannen van de gemiinte kwaamn met ulder schippe de vuulte tope smieten en iploan. Daogen an u stik woaren zu doa mee zoete.
‘t Voornoamste was da de boel were proper wasen da de vrimdeliengen weren ip ‘t strange kosten.

Properteit is an de kust u tere plekke... en daorom is ‘t er gin plekke voa terre-plekken... Verstoaj em? Terre-plekken en teere plekken, ‘t is mor u lettertje verschil!

Nu zitten al de brislames oender ‘t zand, moa vroeger lagt er ook vele terre ip ‘t hooft.

En da was vele moeilijker om ip te kuuschen. Mè je schippe tusschen de plom pers, da gieng nie.

En doar zoaten de meeuwen en de krabben en wast dus groate miserie.

Gelukkig hem me nu masschienerieë zoadat de terre rap weg is, moa doamee is ‘t vaoaderland nie gered.

Ze moeten zorgen dat da nie mè kan gebeuren, en ot gebeurt, dat de boel u bitje rapper ipgetost wordt.

Moa ja, droit weer allemaole roend da geld. De verzekeriengen en were u biin vor an te known.

En oendertusschen zitten wieder mè de miserie.

Flutse