IP ZUN HEISTS...

Ment were allemolle get: Kestag, Nieuwjoar en drie keuningen è we zien al met onze gedachten bie karnaval. We zoaten biena verzopen van de regen en ip eens begostut te vriezen dat krakte. Vroegen giengen we dichte bie de stove gekropen en, moar nu in den modernen tied ist geweun de tirmostat u bitje oger zetten.

Gèn blokstje hoet bie in de stove, gèn schippe antracieten, gin koks van de fabrieke... Moar ook gèn vriezeblommen mer ip de ruten van de slapkoamers. En ojje wilt goan schatsen ton moeie noa Knokke noa de markt, of ipt voetbalpling. Van grachten zien oast nie mè en de koeiepitten viend je nie mè... en al de reste is te gevoarlik.

En toch was da dien goeien oekden tied.
Zwèten in de zomer en koede hen in de wienter, alles ip zun tied... Gelukkig emme nog u kesboom en pakstjes en komt de familie nog nor uus voar u stikstje teeten en u goe voaze te drinken. Gelukkig kommen de joengers nog achter geld met ulder nieuwjoersbrief (liefste meter, beste peter, oe meer da ja gift oe beter...) en lopen ze de 6 januari nog roend met u
slunse ip ulder kop, verklid lik drie keuningen. Mo ge moe ze nateurhik gèn spekke mè geven of u stikstje fruut... ze zoen hem noa je kop smieten.

‘t Liefst van al en ze nu un Euro, en ze kunder ton mee doen wa da ze wiln.

Roendlopen met u bètelucht, dat is gedoan, nu is da ip tende van oktober en noemt dadde Hahloween.

U kloaren hemel gift vost en das de beste maniere voa te zien dad de doagen al beginnen te langn. De doenkere zes weken emme hed, en nu ist moa thopen dat er niet te vele vneswere komt moa al wat da we nu nog kriegen is kortienge. Lippens’ zun ganzen vliegen were overal roend en da wilt zeggen da we dur nog nie van of zien.

Moar an dun anderen kant zien we in de struken de musschen al vechten en de knoppen van de takken zien al ant zwem. Dur komt leven in de browerieje.Our stoan al were witte blommetjes int gas (sneeuwklokstjes). De lente is ip komste, tis kwestie van nog u bitje deure te bieten.

En ton gomme dur in vliegen, lik den Amerikoander.

Flutse