IP ZUN HEISTS...

Hoewe dat hoenderd jaer geleen was kunne me nie mè vertein, moa af en toe u ki lezen in
‘tboekstje van Heyst Leeft.
Hoewe dat viftig joar geleen was, doar kun we nog van mee klappen.

De Knokkestroate lag nog in kassiesteen en langs de Boulevaar passeerde de tring nog.
In de Steenstroate, Onderwiezestraote en iesderstroate en Boaderstroate leefden de
menschen nog goed tope met mankoar.
De meeste woaren uut de visscherie, en dat wilt zeggen dat de wuven chef van de stroate
waoren, en dat er vele gecommeerd koste worden.

Dhuuzetjes woaren meestal een geliekvloers en een half verdiep doa boven. Schoane
geschilderd in ‘t gries of in ‘t licht blow en ook wel u ki in ‘t licht groene.
De vrowen mieken alle doagen de bedden en lieten de sjozen en de bakens buten
hangen om te verluchten.
‘t Was lik alle doagen fièste in die straoten.
En onze ton de bedden an ‘t moaken woaren, ton placeerden ze ulder in ‘t venstergat om
van an den overkant van de straote u klapje te doen. Die kèkelinge kost euren deuren...
Over djoengers, over ulder vint, over ‘t menoage of over deen of dandere miserie in ‘t
geburte.

Tegen de noene moesten ze ton nog zere kommissies doen. Want tegen dat djoengers
nor huus kwamen van ‘t schole moest er algeliek eten ip toafel stoan.
En ‘t was alle doagen van oastje zere wère je!

Eigenlijk begost ut al snuchtuns.

Vesch broad goan dIen bie Dhauws. Adrienne was alle doagen al ip van te zessen in eur
wienkel.
Vleesch giengen wieder goan oalen bie Leon Koas. Kaas vor u benehowerieje... nie
geweune.
Lepn kost die vrowen noga doen goan en ie makte ze geren u twa wies.
Zeker onder joengers in de wienkel stoeng.

Hoevele keren zoet ie nie gezeid en dat er u bananeboot in Zeebrugge toegekommen was
en dat ze de bananen vo niet weggaven?
Je deed ie nie liever of djoengers u twa wies te moaken.

Groensels en fruut kochten we bie Bertha van de VG-wienkel. En in de zomer miekte zie
soepe voa de vrimdeliengen.

Melk en koas giengen we gon halen bie Gaspard. Jat ie u klein wienkeltje neffens Pille van
Loeftens.
Moa dur kwam ook een melkboer thuus: Hilaire Vanhove.

In die tied werd er nog vele thuus besteld Vostje kwam met de gazette, Schroddertje
kwam met de drank en af en toe kwamt er u tjoek tjoek met tapieten.
De bakkers deden ook ulder toernee.

In die tied kwamt de paster ook nog bie de menschen ip huusbezoek, nog zeker ene ki per
joar. Kzien paster Ampe nog altied roendlopen lik u boaneperse in zien lange zwarte rok,
met u strekkei p zien gat.

In de zomer moesten we niet verre lopen achter u crèmtje: bie Jef van den ieskarre in
d’ Oenderwiezestrate.

Wien dat er doar ook weunde was Scheppap. Dat was u specialen en we waoren doar
eigentlijk u bitje schuw van.
Je kost ie wree roare doen. ‘t Schient dat ie in de orloge een schrapnil in zien kop
gekregen eed en dat da doavan zoe zien.

Scheppap reed hele doagen roend met u karretje en ie rammasseerde alles wat dat ie
mee koste pakken.

Zen doa wa gevoenden ot ie ze kop nere geleid eed.

En vaneigens moesten wieder ook af en toe noar de coiffeur. We giengen in de
Pannestraote bie Jan Coiffeur.
Bins dat ie ons hoar â la brosse sneed vertelde ie ook vanalles en ie dee niet liever dan de
kienders u twa wies te moaken.
Moa ze kregen ook altied u spekke, en in dien tied was dat u hele wikkel.

In de Steenstroate giengen we achter vis bie Maria Kluts. Altied ves en eerste kwaliteit.
Vele vis kochten de menschen nie want er was wel altied iemand van de familie die in zee
gieng en de poander moste toch leeg en de portemonnee vul met drienkgeld.

Al moenk dur bie zeggen dat de meeste vis weggegeven werd want in de visscherie is het
nog altied azoa : tene plezier is tandere wèrd.

Een of twè keren in u joaer giengen de menschen achter kleren noa Brugge.

In die tied was dat al u heel spil en ze klapten doar al dagen ip voorhand van.
't Gebuerde ook wel u ki dat ze noa Knokke giengen moa da was doar meer voa de
sjiesjie en ‘t was doar ook al hoendediere.

‘t Leven is oendertussen vele veranderd. De klene wienkeltjes zien weg en de menschen
kopen nu voar u hele weke.

Ze rien met dun otto noa de grote wienkel en vullen de koffer en zen mè moeite nog tied
voa te klappen.

En ge ziet ook al meer vinten in die winkels die mee goan mè moedere... voa te betoalen
en voa thelpen droagen...

‘t Was vroeger goed en ‘t is nu ook nie slicht, en ‘t vornoamste is toch nog altied dat we
geld hen voa te kopen...

Flutse