IP ZUN HEISTS...

Kweet nie ojje gieder da nog wit... moar in 63 wast u vrèè koed joar. Twas zodoanigs gevrozen daje biena te voete van ip den diek noa de kop van de meur van Zèèbrugge koste lopen, over de toegevrozen zèè. Moanden an u stik bleef de sneeuiw liggen en de kolen brandden biena deur de stoave. Da was nog wel u kir u wientertje. Allez, noadien tu minsten, want ip tmoment zelve kosten dur daor nievele mee lachen.

De joengers moesten noa tschole met u dikke sjette mutse en u grote gebreide sjarpe roend ulder nekke en dikke wanten omdat ulder viengers nie zoen vervriezen. De voaders droegen u langen oenderbroek en de vrouwen un gebreide comminizong en u soetjin mè moawen...

Zels de nunnen aan nog u dikke zwarte gebreide sjalle over ulder nunnekappe... An tsas van Heist zoaten dur meeuwen en eenden met ulder poaten vaste gevrozen ant ies... en twas levengevoarlijk om die bèèsten telp’n. Moak zein tal: zoverre of daje koste kieken over twater wast ies.

Da was nateurlijk een attractie om te zien en iederèèn wilde doa wel u kir ip... moa da was verboden want eigentlik waren dat grote blokken ies en doar tusschen u soarte sneeuwpap. Je zoe wel je goaper geloaten en ojje doa tusschen zoe gegrocht zien. Moa kgoa je toch u ki een eigen belevenisse vertein. Kwoaren ip wandel met Scheppertje, mien beste moat en moan alle u ki noa de Lac van Knokke gewist. Twas doar keihard toegevrozen en iedrèèn kwam doa schatsen. Dur stoengn zelfs barakstjes ip ties mè drank en u twa voa teten.

Moar ip u woensdagachternoene woaren wieder ip den diek en liepen we ook u ki ip tstrange. Twas Ièèg woater en ip tstrange loagen dur groate blokken ies. We kroapen zelfs ip u groat stik dat drééf in twoater. Gevoarlik, moar alles oender controle... en voader en moeder woaren toch ant werken...

Moa we woaren wieder zoadoanig bezig da me niet zoagen dat twoater ip kwam. Ip tlatste nippertje an wut gezien en kosten we nog ip tstrange. Moa we moesten nu nog ip den diek geroaken. We liepen wieder nog ip de paré, moa da was nateurlijk hemelste gleddig en u geele karwei voa doar ip te geroaken en ip te bluuven.

Tope gieng da toch nog, en metertje voa metertje klommen we noa boven. Moar achter un alf eure zoagen we dat ‘t water a zoadoanig ip gekommen was damme nie mè were noa beneen kosten. En noa boven giengt apmoa moeilijker en moeilijker. En twas zoadoanig koet dat er gèn mens langs den diek lieptige. We zoaten wieder alletwé met de poepers, en surtoe, tbegost a doenker te worden. We woaren a goed alverwege, moa grochten niet verder nie mè. Moan al onze sjarpen ofgedoan en u geluk van god, tpasseerde doa toch wel almedde u ki u twien zeker.

En wieder moa roepen en zwojen.. . zoadoanig damme al were noa beneen ant tschuuven woaren.

Gelukkig ee die mens da gezien en ons toch geholpen. Kweten nog altied nie wien dat da gewist et. .. moa kweten wel dat ie niet wiste wien damme wieder woaren, van thuus enze dur nooit u twe van geweten. In alle geval, achter biena viirtig joars moe me die mens bedanken, van allène giengen wieder da nie hoald en.

Achternoa enk doa nog dikwijls ip gepeist. Twas leute, moa nie goed voar u twidde ki.

Ze zeggen soms : twas u scheete in un netzak... moa kan je verzekeren damme wieder meer of un scheete geloaten en... en damme alle twèè zèèr in onzen buuk aan.

Moa da goa wè van de koede gewist en zeker???

Flutse