De wienter stoat voa de deure

Flutse

Een schoan voorjoar, een droge zomer en een achterjoar met kortere doagen en langere nachten. Ze zien zere ant korten, de doagen. En ot da wientereure goa komn ist subiet wienter.

De mèreloars schuuffeln nie mè 's nuchtends, de boeren en den oegst binnenhoald , 's nuchtens hangt er een mist boven de velden en de zwaluwen vliegen al roend ip zoek noar een elektrieken droad voa toope te komn en te vertrekken noar 't Zuuden.

Moeder kiekt in heur kasse woar dan de mutsen en de sjarpen liggen. De wientervesten hangn al an de kapstok. Kriegen we een harde wienter, een drogen of een natten, een stiln of vele wiend ?

De verenigiengen zien were in gang geschoten en op de televisie zien de programma's ook verbeterd en ist gedoan met al die herhoaliengen. Achter 't seizoen herpakt hier 't sociaal leven.

't Is de tied van 't vallen van 't blad. Bie d'eerste vorst stoan de bomen were in ulder bloaten en kun we were de afgevallen bladjes toope voagen. Gelukkig komt de voagmachine van de gemeente ook af en toe langs voa 't meeste vuulte uut de grippe mee te pakken.

Herfst makt de mens triestig. Binnenkort ist Allerheiligen en Allerzielen en moeten we were noa 't kerkhof. Ton 't schoanste bloemenperk van de gemeente met al die chrysanten van alle kleuren en de vele bloemstikstjes. En nog een bitje loater de doenkere zes weken, 't Is doenker on de menschen moeten goan werken en t is al were doenker on ze thuus komn. Gif mien moa 't voorjoar met vele groen en een zunnetje da begint warmte te geven.

Gedoan met de verwarmienge. Alhoewel, lastig is da nie mè. 't Is gedoan met de kolenstove, 't is nu chauffage. Voa de gezelligheid zien er die nu een open hèèrd en. De vlammen die speeln in de schowe en moeder die zoagt over al die vuulte in huus. En azoa ist altied untwadde hé.