Heist is nie mè terkèn

Flutse

Ken een bladje gevoenden in de kiespropaganda van 1958 en doar stoend er in met een tekenienkstje: Hernieuwen doortocht Heist.

En nu zien ze were bezig. Hele doagen cammiongs weg en were... Buzen in de groend, boan verleggen, trottoirs verbridderd.

In de Roaveliengen - dan ze ook goan ofbreken toope met 't stadhuus en vervangen deur een containergebow ip de markt - enk de plangs gezien en kmoeten zeggen: 't ziet er goed uut en schoane. Allene die drie torren in de Knokkestroate werken ip mien siesteem !

Tusschen de boulevard en de Knokkestroate komt er een pling, een parkstje. Heist kriegt vele groen. Fluppe Stove (schepen Philippe Vlietinck) heet doar gin groenen voaren nodig. De Elizabetloane die Heist lik een beenhowersmes in tweeën sneed, wordt ontdubbeld en van twi boan goan ze één moaken... in twi richtiengen.

Vele bomen, vele groen, een nieuw Vissershuldepling en een nieuw Heldenpling en d'otto's oender de groend. De helden ('t stanbeeld) moeten wel weg noar een andere plekke (voorzekers in 't bustje ???). In 't bustje woar da de Chalet Suisse weg moet en woar datter entwadde anders komt... toope met een nieuwen halte voa de tram.

Joaren emme gezeid: 't is al voa Knokke... moa nu ist vuile bak in Heist... vor een joar of vuuve.

Heist goat erleven. 't Is thoopen dan der were wienkels komn en nog een poar cafeetjes. Gezelligheid troef.

In de platse van der over te klappen zoender vel ip julder buuk goat een ki goan kieken in de Knokkestroete in Toerisme. Doar togen ze al de plangs en kujje zien oewe dat goa worden.

Schoane wordt het zeker. Allene nog een vroagtje: wien goat dat allemolle betoalen ???