De kiezienge

Flutse

Mien belle is noa de voantjes. Ken enig te keren ip meugen stoan uut mien zetel onze belden. K'peisde dat er woaren van de Getuigen van Jehovah moa 't woaren der van de kiezienge. K'zien kik .... tope met nog een poar en we steln wieder ons voren voa de kiezienge. En 't is voa te vroagen ojje een ki ip ons wilt peizen...Peizen gin probleem, stemmen dat is wat anders.

Moar alli zen ulder besten gedoan en kvoen kik da wreed koerazjeus van die menschen. Onze een stappenteller mee aan goan ze zeker goed gescoord èn. In oktober hemme vele volk over de zulle get.

Mien belle eet loaten weten en mien brievenbusse zat alle doagen vul. Ze zien allemolle voa 't leefmilieu mor der is nog nooit zovele papier verspeeld. En we leven in een digitale wéreld, zeggen ze.

lp de computer was 't van zelfste: filmptjes a volonté. En wieder goan dit, en wieder goan dat... Onze al doen wat dan ze beloofd èn ton gomme gin platse mèr èn voa te wandelen want 't got allemolle vul stoan met blomn en planten. En voa d'oto's gin platse nie mè want da worden allemolle villoboantjes. 't Goa krioelen van de polities ip 't stroate en iedereen got ip zien gemak kunnen wandelen van 'nuchtends vroeg toe 's avends loate. Een huuzetje voa de joenge menschen gin probleem: vor een appel en een ei gojje da kunnen kopen en da noemt: betaalbaar wonen. Allemolle èn ze gezeid dat bie ons wreed goed goat en 't beste is voa te weunen... en toch willen ze vanalles verandern. Langs de stroate stoenden er gin plakoaten mor der reden wel veel otto's roend met affichen.

En ip de markt stoenden er groepjes van menschen in t zelfde tenuutje. En moa bladjes uutdelen. Nu zien me die menschen nie mè en lopen ze ook nie mè in onze weg omme goan markten.

Zelve kochten ze nieks. Zaan gin tied. Babbelen en bladjes uutdelen.