Ip zun Heists - Flutse en Zwarte Piet

Flutse

 Wa vor un spil eed da were nie gewist de latste weken over Zwarte Piet en Sint Nikloj. Tis lik of dad de wéreld gienk vergoan.

Dun een of anderen slimmen Hollander eed klacht ingediend omdat Zwarte Piet een neger is en da dadde racistisch zoe zien...

Toet ip dun andere kant van de wereld ender ulder bie bezig goeden. Zelfs un madamtje van de Verenigde Naties (uut Suriname) voend da belangrik genoeg om un rapport te moaken. Miljoenen menschen vergoan van dun oenger en niemand klapt ur nog van moa van Zwarte Piet in Holland (ze weten nog nie dad de Belgen dadde ook en) doar liggen ze an dun andere kant van de wereld van wakker.

We gont proper oeden moa je kut toch moeilijk zeggen an de joengers: Hier is Sint Nikloj met zien witte piet...

Tis traditie: Sint Nikloj komt uut Spanje met zien knecht(en) en da die knecht nu un neger is doar liggen alleene moa de kiendjes van wakker uut benowdtijd.

Gelukkig zeveren ze nog nie over ’t kleur van de zak.

De dag van vandoage is Zwarte Piet un kluchtigoard die stoat te ziengen en te spriengen voa de joengers ’t amuseren.

Jeet schoane kleren an mè vele klurtjes: un mutse met un pluume, een wiede bloese en un kort broekstje (speciaal voa de joenge moeders).

Je droagt zien zak ip zien rik en smiet af en toe mè spekken.

Iedereen viend hem simpatiek en ot ie zien ogen opentrekt in zien zwarte kop ton ist lik een van un andere planete.

Oewe kujje doa nu problemen mee en...

Woar got da stoppen?

Zwarte Piet is gin neger mor een die zwart is van deur de schowwe te kruupen. En zien dikke roo lippen? En zien kruloar?

Ja menschen, un bitje fantasie mag ook hé!

Subbiet goen ze het nog en over de Drie Keuniengen. Dur zat doar ook un zwarten tusschen hé. Balthasar en Melchior woaren bleek moar Gaspard was un neger.

Eigentlik was da un verwiezienge noa de gekende werelddelen van toen: Europa, Azië en Afrika.

Got dur doar ook miserie van komn?

Met die drie Keuniengen is ter eigentlik al miserie van ken horen zeggen dat mrg. Leonard al un ki gebeld eet noa ’t keuninklijk paleis voa te reclameren.

Monseigneur Leonard eed gezeid tegen Sire Filip dad dadde gin werk was dat de Kerke drie Keuniengen eed en dad ’t paleis nu drie Keuneginnen eed.

De Drie Keuningen komn van drie werelddelen (Europa, Azië en Afrika) en de drie keuneginnen komt uut drie verschillende landen: Spanje, Italië en België.

Let ip mien woorden, ’t go niet lange mè deuren of dur komt doa “boel” van.

Ken al hoort dad er un dillegoasie van de Verenigde Naties noa Carnaval goe komn voa te kiekken otter niemand verklid is in een neger of een Chinees.

Tgot er niet ip verbeteren.

Nog un bitje en we goan ons nog allene meugen verkleen in ons zelven.

Of moesten we ons un ki allemolle verkleen in un zeurpruume voa te lachen met da mensch van de VN en eur rapport?

We kunn eur inviteren voa te komn (ip eur kosten) zoa da ze un ki ziet oewe damme wieder leven!!!