Ip zun Heists

Flutse

De zunne is were van de partieje achter zes moanden vn vuul were en de menschen kommen were noa buuten vor u klaptje te doen.

De wuven kunn were commeren en de vinten kunn grote vertellementen doen over de politiek, de visscherieje, 't were en wien dat er allemolle doad is.

En ton begint ut. Je moe mor u ki trachten t explikeren wien da je bedoelt...

Ken horen zeggen da Louis ook zun goaper gelaten eet... Louis ? Wa vorre Louis. E wel, Louis die mè diengste getrowd gewist eet hé. Ja moa, de dieje kennen kik niet wè.

En mor allé gow. Diengste uut de diengestroate... de deze met heur sjette mutse ip heur kop en heur grote sacoche.

Heur vint aat niet te zeggen tuus... dun dienen mocht het ook èn wi mè zuk vrowmens.

Louis, dat is toch nooit dun dienen die gestopt is mè voaren omdat zun wuuf nie geren allene thuus zat zeker?

Da weet un kik niet.

Zo goed ken kik dun dien nu ook nie, mor da zoem me wel verwoendern van de deze van za zie gin zittend gat en van ot ie in zee was ton was ze zie de piste in.

Ewel goe were wien zoeter da gepeisd en van de dieje en van dun dezen?

Je kut nateurlik nog euren klappen van dun dezen en de dien 't is toch gin mens die wit van wien da ze bezig zien.

Zukke parlee emme dikwils hoort in de cafeetjes an dun dis. Doar ender vele over de toenge gerold.

En ojje noar huus trok woar je were ip dhoogte van al de nieuwtjes en thuus kost je nog u kir u twa vertellen an je vrouwe die ook un kerieuzeneuze was en binst da ze luusterde was ze nie ant zoagen!

Ojje u zinder ip at ton wast beter van te zwiegen en os ze begoste van heur oren te moaken was t beter da je geboarde da je van zattigheid in sloape gevaln woart.

U ki dat dad orkoan uutgeroasd was koelde da toch zoender bloazen en sanderdags kost u mens ipnieuw beginnen en was twere van lekt me liptje.

En a zoa bleeft er leven in de browerieje.

En omme ton were ip un hoekstje stoeng te babbelen wisten we were van wa geklapt hé en va wien.

Al de vingten aan thuus u dul vrowmens en wat is ter nu geestiger dan doarover te vertellen, surtout o ze da nie hoorde want anders wast were pantemiene thuus...