Ip zun Heists

‘t Is wreed wat dajje tegenwoordig allemolle hoort. De pasters doen vule manieren, de politiekers valn met ulder regerienge en in lesland speeln ze heel ‘tjoar van Asschewoensdag. En wieder, simpele menschen, zitten dur mee. ‘t Stoend in al de gazetten wat dat de biskop van Brugge uutgestoken eet. En iedereen zegt: oew is dadde in Godsunnoame meugentlik?

Ik gon dur nie vele over zeggen moa één twadde weten kik: tis spietig vor al de pasters, nun en frères die wel ulder manieren gebruken en die wel leven lik of dad tsien moet. Ze delen in de brokken en dadde is nie serieus van die menschen en da zeker niet verdiend! En tzien dur nateurlik ook vele die in ulder handjes vrieven en dur ulder kot in en dad al die smèrlapperieje nu uutkomt... we leven in u roare wèreld.

En in de politiek is tnie vele beter. Joaren an u stik dwèzen ze over u twadde dad ur niemand verstoat en deze die zeggen dat de regerienge drie joar nieks gedoan heet roepen nu dat u rampe is voa ‘t land dat die regerienge valt. Verstoi gieder doar nog u twa van... ikke niet.

Overal were plakkoaten met lachende smoeln lik u reclame voa tandpasta... en dun enen is nog beter dan dun anderen. Ze gont were allemolle versloan en ot twoar is komt er ier echt un Aards paradies. Vele beloven en winnig geven doet de zotten in vrede leven Ze droenken nog u glas en pisten nog u plas en alles bleef lik of dad was.

Mor alli ken toch were vele handjes gekregen en iedere ki vroegen ze: je got toch ip me peizen hé zundag. Vaneigens dadde... moa peizen is nie genoeg hé van ze moeten ook u stemme kriegen.

En ton al die asschen uut lesland van die vierspugende berg (vulkaan in t schoon vlams). Al de menoajewuvetjes woaren bezig met de grote kuus voa Poaschen en ammeki kwam tur dor u wolke met stof en asschen uut lesland. ‘t Schilde gin oar of ze mosten erbegin met de waste...   Al de vliegtuuggen bleven an de groend en deze die ip reize woaren mochten gunter bluven.

Gelukkig is al die vuulte in de lucht gebleven en nie noa beneen gevaln ip onze huuzen en in de wei en en de velden... de boeren gieng were u szoagtje gespannen en! Europa gieng meugen subsidiëren en de priezen gieng wel ipsloan.

Al bie al ist nog in de rede gebleven moaja ‘t is ook nog nie gedoan. Wien wit wat ur ons nog allemolle te wachten stoat?

Flutse