Ip zun Heists

Ejje dur al u ki ip gelet wat dat de menschen tegen mankoar zeggen osse mankoar tegen komn ?

“Elk zun goeien dag en oe ist ? Ewel ‘t is lange geleen, ‘t is wel u wirtje hé.”

En ton begint ut, t gekèkel en de conimeerderieje.‘

En ejje dad al hoort van den dien en wist je gie dadde van dien andern ? En ist woar dat Pier zun wuuf ee baten zitten ? En wat enk hoort is julder Madeleine were in positie ? En wadde was da doar juste met Kamiel en Gusta... t zat er doarre u ‘serieuzen hoar in de beuter enk hoort. Jeet eur nogal u kuupienge gegeven... zen de politie moeten bein. En osse nietend nie mè weten over dun andern ton klappen ze over ‘t were.

t Stikt agliek we tegen ee hele doagen aapmoa die regen, we gon a gowe verzupen. Tee lange droge gewist moa nu zien zulder schoa ant in om t woater stoat ip t land en ot a zoa voort doet got agowe gin leegwoater mè zien. Kiekt u ki hoe zwart dat were zit, t go mollejoengen broaken.

t Is hele doagen ‘tzelfste t stikt tegen. En da zien gin vloagen nie mè mor otter uut valt is stroent met hakstj es.t Zoe beter u ki goed vriezn dat al t fenienk kapot is. Un arte wienter en u goe zomer lik in de goeien oekden tien, t is da da we moeten en. 

Moa ja, get nie lik of daje da wilt he. En misschien best ook want t zoe nooit vor iedereen goed zien.‘

Vo de boeren ist toch altied te nat of te droge. Zunne binst dun dag en u vloage regen s nachts, t is dadde da we moeten en. 

Mo ja, t is toch nog niet te koed voa de tied van t joar. t Is ‘al profiet in de stove En apropos, ejje t hoort van Louis, jet ook zun goaper geloaten‘he. Je lagt ie doad in zun bedde. U schoanen doad en jeet van niet geweten. Moa tis moar al voa de dee die achter bluven hé. Moa lange ofzien is ook gin lachedieng wè. Ja, t is tenige da we zeker weten: we gon allemolle om zepe. Dun een u bitje vroeger dan dun andern moa dran moeten we. En ze komnt nie vroagen vor ons te komn oaln. 

Beleefd bluuven en ze baten voren goan en profitern zovele of da we kunnen. Antien u klaptje doen en u druppeltje voa t herte en jun ogen de kost geven zo lange of da da nog goat. 

Allez, kzien weg anders kriegenk were slichte punten van moedere.

De complementen thuus ee en toet te noaste ki.

Flutse