Ip zun Heists

Ken hoort da ze in ‘t museum Sincfala u twa goan doen roend “Religieus erfgoed”, u vree ingewikkeld woord voa te zeggen da ze zieder u twa goan doen roend de kerke.

En ku peizen in mien eigen:
Waor is de tied dat de frères, de pasters en de nunnen roend liepen met ulder lange rokken an, en met aan de kant u grote poaternoster?

‘t Was toch wel u twa heel speciaals hé, die pasters die langs stroate liepen in soiree met u grote roende hoed an, of dun oenderpaster met zukke vierkant hoedje ip zien kop. En den ipperpaster die toan nog u grote zwarte strekke ip zien gat had. Ik voend dadde u twadde voar noar ip te kiekken. Zuuste lik un uniform van u gendarm of u politie, of die lange roks van dejugen en de advoakoaten. Tad iffect, ‘t deed u twadde, dwoenkt respect of. Moa bie de pasters en de nunnen was da mysterieus, da woaren lik gin echte menschen die doar inzoaten.

As kiend vroegen kik mien altied of onze zieder ook noa de WC moesten goan en koan altied kompassie met de pasters en de frères die al de knoptjes moesten opendoen...
zaan zieder vurzekers af en toe u ki pries zeker?
Ze deen zieder da vorzekers altied in dun duuk van ik ken nooit een weten goan, k zoagen dadde eigentlik ook nie zitten.

En ton de grote vroage oewe da ze zieder dur zoen uutzien zoender roks of kappe Want die zwarte rokken kosten ook vele kamoefleren. Aan ze ziender wel or? Giengen de nunnetjes ook noa de coiffeur? Of staken zieder doar zelve de schoare in?

‘t Is en bluuft u miesterie.
Achter ‘t concilie in dejoaren ‘tjestig wieren we al teen en tander gewoare. De rokken wierden korter, de kappen klinder en de frères en de pasters begosten vesten en lange broeken te droagen. En ‘t was subiet heel wat anders. In u poar joar tied wierden da ineens geweune menschen.

De Paus in ujeansbroekstje, das misschien de volgende stap. Moa kzien mien nog nie stoan zwoien nor u vintje met werkmpansklèren ip ‘t Sint Pieters pling...

We kommen van verre. Goed veertig joar geleen zeit de paster nog ip de prikstoel dat heiligschennisse was voa mee te doen me carnaval en nu leren ze dadde al in ‘t kleuterklastje. Bie de nunnetjes mochten de mei stj es allene u lange broek droagen onze dur u rokstje boven ip aan. En de zundag mosten we onze puntekoarte laten afstempelen in de Messe voa zeker te dien da we gewist woaren.  De tieden zien veranderd en da goje zeker kunnen zien in ‘t museum. Nog u bitje patience

Flutse