Ip zun Heists...

Get tgieder vurzekers ook hoort.. .Woa da Van Laere was langs de Knokkestroate, got ur nu un grote wienkel komn, allez u soarte superbazaar zeker.
‘t Is toch allemolle zère ant verandern hé.
Woar is de tied damme alle nuchtend moesten achter onze commissies goan. Moeder de vrowe pakte eure netzak en ze was piepe. No de beinhower achter vlees, en u bitje toespieze en ton achter groensel en u bitje fruut. De bakker kwamd an de deure... herinner je gieder julder nog Ons Brood die met peerd en karre zijn toer deed, of Gaspar de melkboer die met zijn hoendekarretje deur de stroaten koerste.

Of Vostje die alle doagen met de gazette kwam?
En ton oje ook nog de brower die kwam met toafelbier. En we goan ton moa niet klappen van Guusten van den elektriek of Pol van ‘t woater, die kwamen voa de conteur ip te pakken...

En den facteur dost ook wel u ki binnenspriengen, surtoe ot dustig were was.

Die goeien oekden tied is eigentlik nog allemoale nie zo lange geleden, ‘t is juuste van achter den orloge. On de vrowen commissies deen, dan was dat ulder bezigheid van ‘t vornoens. Ze deen overal ulder klaptje, en achter een kart zijn ze ton : allez, kzien zère weg, van ‘t is bezigen tied. Moar onze drie wienkels mosten doen in de vornoene, was de dag al half gepasseerd.

Van un diepvries was ‘t er nog gin sproake, zelfs nie van een frigo. Dus moesten de vrown alle doagen versch tuug in huus hoalen. Moar al die wienkeltjes zien nu weg. Nu ist nog éne ki in de weke aanzetten met de otto voa alles in ene ki mee te bringn. U hele bak woater, vlees vor u poar dagen, toespieze van verschillende soarten, u poar dozen soepe, kiekken on de conserven in reklame zien... en de vint is nu choffeur van madame... je meugt ie helpen dragen, en betoin.

En ot tie tevele moeit zegt ‘t wuuf : wacht u bitje in den otto...
‘t sossiaal contact is tur nie ip verbeterd. Je moet alles zelve pakken in de reke en ojje u twa moe vroagen is tan utwien da je nie kent. U joenk spriengertje da zelve nog nooit commissies gedoan eed.

En voa te betoin ejje zelfs geen geld mè nodig. Je gif je koarte of en ze steken da in u machientje, en ‘t is gebakken...
Misschien best ook, van met dien Euro is toch nog altied u sukkelienge. Mor oendertusschen zien alle de wienkeltjes weg in Heist. Hoevele bakkers en bèènhowers zien dur nog? En klèèrwienkels? En groensels en fruut? En van de cafeetjes goan we moa zwiegen zeker. ‘t Is daarom dat Heist zo leeg toogt. ‘t Dorp is u ruine ant worden.

Tstoat allemolle ipgesloten... ‘t worden krotten.

Gelukkig wordt er in de Kursolstraote were gebowd. Most da stik toet an de nunneschole were nieuwe worden, ‘t zoe da vele schonder zien. Me goander u ki moeten in vliegen, want ‘t is nodig dat Heist HER-leeft, zoeit geloven !!!

Flutse